Proxecto FAIN
- O obxectivo principal do proxecto FAIN é ofrecer apoios a familias con nenos menores de 18 anos que reciben o Ingreso Mínimo Vital ou a Renda de Inclusión Social de Galicia (Risga) nas principais cidades galegas e en zonas rurais. O prazo para inscribirse no proxecto rematou en decembro de 2022.
- O proxecto ofrecerá apoios ás familias en tres áreas: o paquete de apoio social, o paquete de apoio educativo e o paquete de inclusión activa. Para iso, no proxecto participarán en máis de 3.400 familias, que a través dun sorteo realizado polo Ministerio de Inclusión, Seguridad Social y Migraciones serán divididas en dous grupos.
-
- En que consiste?
-
As actividades poderán ser de tres tipos:
- Paquete de apoio social: este apartado consta de cursos en saúde e coidados; axudas económicas para gastos sanitarios; cursos para mellorar a calidade de vida no fogar; axudas económicas para a vivenda; axudas económicas para reparacións no fogar; axudas económicas para o pago de subministracións (auga, electricidade, gas); cursos de informática; cursos sobre o coidado dos fillos e actividades de participación comunitaria.
- Paquete de apoio educativo: apoio individual cos estudos, axudas económicas para material escolar e axudas económicas para actividades educativas extraescolares.
- Paquete de inclusión activa: cursos en distintos temas para axudarte a conseguir un emprego, sesións de orientación laboral, axudas económicas para a conciliación laboral.
Os servizos e axudas que recibirá cada familia no seu itinerario personalizado dependerán das necesidades que se identifiquen no diagnóstico inicial que realizará cada familia xunto co equipo profesional.
- Onde se leva a cabo?
-
O proxecto desenvolverase nos concellos de Ourense, Lugo, Pontevedra, Ferrol, Santiago de Compostela, Vigo, A Coruña e nas seguintes áreas rurais:
1. Concellos de Bóveda, Monforte de Lemos, Pantón, Pobra de Brollón, Saviñao e Sober.
2. Concellos de Baltar, Calvos de Randín, Os Blancos, A Porqueira, Rairiz de Veiga, Sandias, Sarreaus, Trasmirás, Vilar de Barrio, Vilar de Santos e Xinzo de Limia.
3. Concellos de Castrelo do Val, Cualedro, Laza, Monterrei, Oimbra, Riós, Verín e Vilardevós.
- Canto dura?
-
O proxecto durará desde decembro de 2022 a outubro de 2023. Se a súa familia forma parte do grupo con actividades, recibirá apoios do proxecto durante un máximo de 10 meses; se participa no grupo sen actividades, deberá realizar dúas entrevistas de avaliación ao principio e ao final do proxecto.
- Que beneficios teño ao participar neste proxecto?
-
As familias participantes no grupo con actividades poderán recibir os apoios do proxecto FAIN.
As familias participantes no grupo sen actividades recibirán unha compensación económica de 25,50€ (previsiblimente en forma de cheque ou similar) cando realicen a primeira entrevista de avaliación, e 25,50€ cando realicen a segunda aos 10 meses (51 € en total).
- Como podo participar?
-
Unha vez firme o documento de consentimento informado, a súa familia será introducida no sorteo de selección de familias participantes que se celebrará en decembro de 2022, no que se formarán os dous grupos (familias con e sen apoios do proxecto FAIN).
A participación no proxecto é voluntaria. Quen decida participar deberá realizar as actividades indicadas (grupo con actividades) e as dúas enquisas previstas (tanto os do grupo con actividades como os do grupo sen actividades).
Os participantes terán dereito a saír do proxecto cando desexen, no caso de facelo deberán comunicarllo ao profesional de referencia ou enviar un correo electrónico a proxectopilotofain@xunta.gal (para máis información e resolución de dúbidas sobre o proxecto tamén pode contactar coa Consellería de Política Social e Xuventude a través de dito email).
- Quen o leva a cabo?
-
Para facer posible este proxecto, o Ministerio de Inclusión, Seguridad Social y Migraciones e a Xunta de Galicia (a través da Consellería de Política Social e Xuventude) firmaron un convenio, financiado cos fondos europeos para a recuperación despois da pandemia da COVID-19 (Next Generation EU).
- Protección de datos
-
Os datos persoais recadados no marco do proxecto FAIN, serán tratados pola Consellería de Política Social e Xuventude na súa condición de responsable do tratamento coa finalidade de levar a cabo a xestión e desenvolvemento dos obxectivos do proxecto así como a avaliación da súa implantación e seguimento das actuacións levadas acabo co fin último de contribuír a promoción da igualdade, a inclusión social e a loita contra a pobreza nas súas distintas formas.
A base lexitimadora do tratamento dos datos persoais é o cumprimento dunha misión realizada en interese público en base ao disposto no artigo 6.1 e) e na excepción prevista para o tratamento de datos de categoría especial no artigo 9.2 h) do RXPD, todo iso fundamentado no disposto na Lei 19/2021 de 20 de decembro, pola que se establece o Ingreso Mínimo Vital, na Lei 9/2007, do 13 de xuño, de subvencións de Galicia e no propio Decreto polo que se establece a estrutura orgánica da Consellería.
Os datos poderán ser comunicados ás Administracións Públicas de ámbito autonómico e estatal cando sexa estritamente necesario para o cumprimento das súas respectivas competencias, en particular á Secretaría Xeral de Obxectivos e Políticas de Inclusión e Previsión Social (SXOPIPS) e ás entidades do terceiro sector de acción social colaboradoras na xestión deste proxecto. Así mesmo, poderanse realizar as verificacións necesarias para comprobar a exactitude dos datos.
As persoas interesadas poderán solicitar, ante o responsable, o acceso, rectificación, limitación e supresión dos seus datos, así como opoñerse ao seu tratamento, a través da Sede Electrónica da Xunta de Galicia ou nos lugares e rexistros establecidos na normativa reguladora do procedemento administrativo común, segundo se recolle en https: //www.xunta.gal/exercicio-dos-dereitos. Contacto co/a delegado/a de protección de datos e información adicional en https://www.xunta.gal/informacion-xeral-proteccion-datos.